Français
English
 

 

 

قبل متقول ''السواسة شعب مذلول, عاود فكر مزييان قبل ...''


منين الدولة كان مهمشة مناطق سوس و خلات ناسها بلا تعليم و كتعلم غير ولاد العاصمة, السواسا مربعووش يديهوم و بقاو كيتفرجو, ناضوو و مشاو للمدن الكبرى و دارو تجارات بسيطة باش يعيشو ويضمنو لاولادهم مستقبل, و فاش الدولة كانت كتعفي التجار الفاسيين من الضرائب و كتغرق بيها السواسا, صبروا و تقاتلوو و تقشفوا باش يطوروا تجارتهم و يجمعوا لاولادهم الفلوس يمشيو يقرااو تا هوما فالخارج بحال ولاد الشرفا اللي عاطياهم الدولة امتياز .. و منين الفاسيين حسوا بالمنافسة و حسوا باللي السواسا فاتوهوم رغم كل العقبات التي وضعت أمامهم قصدا, بداو كينشروو وسط الشعب ثقافة العنصرية ضد الانسان السوسي, ''عندو الفلوس حيت سقرام و كيقتل ولادو بالجوع'', و بدا كيخرج دوك النكت الحامضة و دوك الألقاب الخرائية, شويا مع الوقت ولا الطفل كيتزاد و كتزاد معاه ديك النغزة د العنصرية ضد السواسا...

حتى ولا كلشي كيتطاول عليهم, و لما كان السوسي انسان مسالم و ذو أخلاق, شي شمايت استغلوا هاد النقطة لصالحهم, كيف هذا؟؟ كتلقى واحد ماشي سوسي خدام عند الدولة كتعطيه 1500 درهم فالشهر, كتسالي ليه كيتحنسر كيلقى حداه غير مول الحانوت السوسي اللي يقدر يعتقوا, كيشري الزيت و السكر و الكونفيتير و أتاي و العدس و كيقيد داكشي فواحد الكناش, و بما أن داك الكناش ما تابع لحتى قانون, السيد اللي كان محنسر ايلا كان بدون أخلاق راه مكيخلصش, وكيولي أمام طريقين, ايلا رجع عند مول الحانوت عاود قاليه كريدي ليا مول الحانوت غيقوليه لاا اسمح ليا حتى تخلص اللي عليك, هنا مول الحانوت غيكون سقراام و ماشي راجل و عنصري, ويلا عاود تعاطف معاه وكريدا ليه, كذلك غيكون شماتة و ماشي راجل .... و كيبقاو كَاع الطرق تؤدي لاحتقار الانسان السوسي.. تعامل معاك زوين ولا تعامل معاك خايب كيبقى خايب..


و بما أننا حنا فالمغرب عندنا خلل فمفهوم الرجولة, و عندنا الراجل هو اللي كيسكر و كيهلل فالزناقي و كيخسر الهضرة و كيغوت و كيتضارب و يهز الجناوا, و السوسي عكس ذلك فإن الراجل السوسي ماشي راجل, الرجل السوسي غير شماتة و يبدل كل ما في طاقته يضمن لأسرة ديالو حياة هادئة و آمنة و مستقرة, و كيعرق و ينشف باش يجمع فليسات و يبني الدار باش منين يموت ولا يمرض ولادو و مراتو ما يتبهدلوش بعد منو, الرجل السوسي غير شماتة مكيرضاش يخرج يسعى و يطلب الناس يشريو ليه الدوا ولا يخدمووه و يحرثوا بيه .. الرجل السوسي الما د وجهو عزيز عليه, و كيحشم يخرج للزناقي يسب و يغوت و يدير الشوهة .. الرجل السوسي غير شماتة, تعطيه الأمانة يردها ليك, مكينصبش و مكيسرقش و مكيغدرش .. الرجل السوسي مجرد شماتة ذو مباديء, كيدير جهدو يربي ولادو احسن تربية باش ميخرجوش يكَريسييو, و باش ميتحششوش و باش مكيتكرفوش على الضعفاء في أركان الأزقة المظلمة ...

هاد الصفات كاملة و كتسمييونا شعب مذلول؟؟ ماذا لو كنا مذلولين فعلا اش غتقولو علينا؟؟
مع ذلك أنا كنقوليكم باللي الانسان السوسي, سواء رجل أو امرأة يتسامح معك فكلشي إلا فولادوا و فأرضوا... و ايلا بقيتوا ضاسرين عليه بحال هكاا, فلن تكون الأمور بخيير ... ااه, و قبل متقول ''السواسة شعب مذلول, عاود فكر مزييان قبل ...''

و ختاما,
'' أنا سوسية, و أصلي فوق كل اعتبار .. قول علينا اللي قلتي غنبقى كنتكلم السوسية, و منين نتكلم الدارجة غنتكلمها بالنطق السوسي, و منين تقوليا منين انتي غنقوليك من سوس, و منين تقوليا انتوما سقرامة غنقوليك هذاك سميتو الحس الإقتصادي, و الراجل السوسي رااااجل و نص حيت أنا عارفة مزيان المفهوم الصحيح د الرجولة".


الكاتب: فاطمة أنجار

بتاريخ : 2018-12-06 08:05:00

تابعنا على الفايس بوك

 

 
 
تواصل
Partager sur Facebook avec vos amis-es
 
 
  مقالات لنفس الكاتب
ارسل المقال الى صديق
Article lu 6886 fois
 

تعليقات القراء

هده التعليقات لاتمتل رأي أمازيغوولد بل رأي أصحابها

 
تعليقكم هنا
الاسم
البريد الالكتروني
عنوان التعليق
التعليق
انقل كلمة التحقيق 8sl3fqlv هنا :    
 

 

 

 

 

 

 

افتتاحية

قرئنا لكم
وجهة نظر
مختصرات
مواعيد
استجوابات
لقطات
رسائل القراء
استطلآع للرئ

مقالات اخرى

تقافة "اخربيش"..والغناء..!!
بتاريخ : 2019-11-04 21:24:00 ---- بقلم : عمر افضن






نهاية "الصحوة"، ما العمل ؟
بتاريخ : 2019-06-24 22:37:00 ---- بقلم : أحمد عصيد


كلنا ضد أحمد عصيد !
بتاريخ : 2019-05-30 02:10:00 ---- بقلم : Marwan Marwani








 

Headquarters : Amazigh World  (Amadal Amazigh), North America, North Africa

  amazighworld@gmail.com

Copyright 2002-2014  Amazigh World. All rights reserved.