English
 
 
   
 
 
 
 
 
 
   
   
 
 
 
 
 
 
   
 
 
 
 
 
 

 

 
Ddelt isguttn

Ini llan ur llin, ggudin maca ttusdersen, amm waman n lmarur !  eg ammi i trid ten ed tamzd  cceden ak ger ifassen zund igidu! Teddert ammas nnsen, ku yass, ku tassat. ccaren ak d twirga, s yissen a s da tssilyt ar tzugguzed unfus. Lhlt nnsen da tessla izran, tarw ak ed imuxyad d unezmum. Tamara nnsen ur tli tikwla, ar ek tberrey. GHas add yali yan ifilu n usidd, kejmen aghwlaf nnsen, ttemren digs amm uselghigh, negh uckan dat wallen nnek, amm irugga, amm twargit igufen, Iwa rwel amz ten ed, mzallan s enwa zund tiwili yesduy wuccen. Tafed ighef nnek ghas key, ammas n ukabar war isem, ur ilin taghzi ula tirut, ammas n imdanen war izran, mi teccard tudert, mi teccared aslix.

Tughaled ghursen, wan yan umudn, wan yan uldgig inettn, tgid aberrani amm tudert nnsen, axlawiy amm wafa n Rbbi kkasen ed wayd wamek, milli zr sen s ttawil! sawl asen xef tmara nnsen, xef wukkuf nnsen, ar zrk sxuzzuren. Ayenna trid teqqised asent, yuf ghursen is iwghen i yneqqiben n wafa izelfen ula yak sellan ; Huz iwaliwen nnek ad asen kejmen anelli, ad ak ed inin, tuf asen lmut g unezmum d tixat. han ad asen tsiwled xef umezruy; hat irzag asen g imawen, ammi  da teccancafed attib aqbur, yagin ad ijjey , d inemruruyen ur ittesmuren.

Siwel asen xef tghawsiwin trid. maca ekk asen ttrf nitni ! haten ar ak ferrun, ar ssefrun, awin awal, awin ed awal, tighild id nniyt, tighild is ka ur ten yagh, telha ghursen tudert, d iberrin ixataren ! ighilen is da ddern tudert nnsen, zzigh da ti meddln ! adday tmmectegd a ed tasid awal izan izman, waxxa iga ghas awal, mmesxuzzuren gerasen, grin dik yan uraa isdren aman g ifadden, bbin lhst , mraan, ssilin dik allen sugzen tent inin ak : fkagh s ttisa dat agh, ddu ad ad tseksud ma ghef tekkated aqellal nnagh nnek! Tafd digh ixf nnek ghas key, iwa haggwem mantur ikkat unzr, ad iffegh waggu geratun .

Amata degsen htigh t, llan winna yallan xef tudert nnsen ar  kkaten herribu  ; llan winna an winna ittelqqafen iman wahli aya. llan winna yesmicen amm lmarif qqimin g tama n umezruy, llan ayt bbux d ayt uxlul, llan winna en tuwd tmara ighsan gen tigelliwin, mi yttuyakkas wuddur d zzaxt, llan winna ybrrmen ar tedn ixfawen nnesn, sddullun tarwa nnsen, llan winna ysawalen amm ddendum ar ceghlacan awin ak ed iriran, Ilan winna yessenfayen s yan uznzar igezzulen mec t sagzen iffegh ed ixf amejjud is t hezzan fghen ed idren, llan winna mi yucka negh yemmunedyils ar shurran s ka n wawal ifemzen issenganixfawen, llan winna yttecfan digh g buccidn iddegh akufen g izran, llan digh winna yak ittinin gan imusnawen negh Imeksawen ihdan tiwili ur igin tinsen ar sgidiyen aggu amm icehlafen, Ilan Winna yegran tarwa nnsen s ammas n ubedduz n terfa. Ilan winna yerrzan g tmizar nnsen rewlen i tmeqqa aghen en amda...

Ilan digh, maca ur tin winna yessidiren asirem, amzn s twirga wargen, ar tteqlen mantur itteffegh waggu tizi ad ddun, winna ghur tuf Imut tudert n ddaw ufus, winna Ygennun icerrigen nnsen, ar jujjuyen itersan nnsen. winna ghur thla tarwa nnesn, winna yetnadan asafar i yedban nnsen, winna mi qqeflallin yiman nnesn, winna mi suddumen s idammen wulawen nnesn. winna mi yucka unuddem g wussan nnesn, winna mi yga wawal d idles tawuri nnsen, winna yettinin mayd ukzen, winna yumzn s izran nnsen. winna yetnaghan d wattn ixwlan tisutiwin g warraw nnsen, winna tesmmuri ddelt yaghen akal nnsen, winna yetteddun s yd ddun s wazal ddun g unzr d ideflawen af ad ed raren aman s asif nnsen...

Iwa may ttukzem g umesnay-a ! ghas s ttawil han ka yettawin azzaz, azzaz s awal negh tala ! abrid nna tram tekkim t, ku tixsi tugel s adar nnes. awd tawda hat tumz s bab nnes ! ayddegh ay ed illan, iwa mnuyat udmawen nnun iferghen amm ighenjiwen ! mmumyat negh tebezqem ! kkesat taghamut negh ad awen gin lemdawid gren awen tibardiwin, awin kwen s amzil ad awen iheyya tisila ! kkesat aghewrc illan dat wawal ! uduyat xla g d  iwa hatin ,  awddi hat ghas  ,  iwa dghi. ,  mec ur tessinem ad awen t inigh : han ddelt nnewn tesgutt.

M.ag mellal. 

 

Headquarters : Amazigh World  ( Amadal Amazigh), North America, North Africa

amazighworld@gmail.com

Copyright 2002  Amazigh World.  All rights reserved.