Tettutit a itri amezwaru enna ed iwcan imezzann

Allig eddidda usid ad annin imazighen ani gher man

Idda usmun ennex iccatn wacal igann win isendal

Ikka essehd ul inw ikka tasa allig iffghen es iseramn

Idda iqqur ughbalu walligh enna ed isswan izuran

Allig iga argan amalu en umazzigh mani enn ellan

Usar ettux asmun inu ayen digi ettghiman iman

Tellit egg ul a Ali all isusem digi ensul an emzar

Ha timitar iwaliwn enna tennit ighudan sull effirak

Ha amzruy enna tessifft illa dati ami egganx exf isennan

Tixat en winna igenn ur ukizen tugga ineqq irifi

Tixat en winna izzenzan amur imazighen ami en emmut

Immughi wul inw a tilufa igad izri imetti

Ur ufix asang ur ufix ayenna gix waxxa tenrix

Mer tannit a lixra ayenna essergigit tasa tefsi

A tadarghall is tiwit assid enna ed ittawin idarr

Ali Khadaoui

Eg Knitra ass en 15-09-2004

Amekraz en tililli

Ad irhem rabbi si Ali argaz ur iggwiden innan mayd yannay

Nekkint amazigh ur tejjax maghayi yamsen yad tameddalut

Enzix eg imezwura umezruy gan ax amur gan amnir eg dati

Ugha ten ittuttix ayenn ekkix eg tudert all ax teghzim tadermiyi

Ezrat amzruy en tamazgha hat egran i izuran tihiddiqqin

A emmis en umazigh aky idda uburz yaghuld igak tameddallut

Iwink imexxar a Ali tawt lhabs allig tusit tassennann ur tedmit

Maca ur ak erzin ul gan am wassif ar isswa eqqah tidemriwin

Allig tugemem a yifsan imghid ililli egran achkuk eg wacal

A tatfi en ighimi enk adday tsawalt a si Ali dat en imeddukkal

Adday da tinit izlan enn tarut aha etgert itran egg tillas

A tatfi en wawal enk adday da ettgat iwneghmis tiwenziwin

Ellan dati usar ettettux hat amur ay gan a Ali eg tezrit i

Izzay wagga magha et yassin han azaza en tmazight igen ghifi

Eggudn isexnad wasa mani egg gha en ammen en seddiri

Esgunfa is ur awn tgi tudert ass umlil a Ali bu tanut

Afa enna tagrit i tghufi umazigh ad akyen yamzenn ezlillut

Att iwc iwinna yadn issiwtt all tmatart enna tgit egg ulawn

Akk irham rabbi yamz ifassen i waraw ennek issusem imeddukkal

Emk itzrit eg manig tellit hat tzrit tixt ennanx isedwiwissen

Usix tagallit ur taghulx a yamur ax tezrit gixt ed iwi

Unna t yiwden ad emmtex ghifs ula ad immet umur ed izerfan inw

Hat ur gha temtaten winna ixater assin tiram en imezwura

Inasen i Behri sulx adday kid ektix asyex tixt igen wacal

Ali Khadaoui

Eg knitra ass en 01-10-2004